Prosiectau Ymchwil

Cyflwyno Dysgu Proffesiynol ar gyfer cymwysterau TGAU, UG a Safon Uwch Technoleg Ddigidol ar gyfer Ysgolion

Dr Sabeen Tahir, Dr Fiona Carroll a Dr Sammy Chapman

Mewn cydweithrediad rhwng y Ganolfan Ymchwil Ryngwladol ar Dechnolegau Rhyngweithiol mewn Addysgu a Dysgu (CIRITTL) a’r Ganolfan Ymchwil Cyfrifiadura Creadigol (CCRC), nod y prosiect hwn yw cyflwyno sesiynau dysgu proffesiynol cynhwysfawr, dwyieithog i roi’r sgiliau a’r wybodaeth i athrawon yng Nghymru ar gyfer addysgu a gwerthuso Uned 4 Datrysiadau Digidol yn effeithiol.

Wedi’i gyflwyno gan Ysgol Technolegau Caerdydd, a’i gefnogi gan Ysgol Addysg a Pholisi Cymdeithasol Caerdydd, nod y prosiect a ariennir gan Lywodraeth Cymru yw cyflawni’r amcanion canlynol:

• Datblygu dealltwriaeth athrawon o wefannau trafodiadol a’u paratoi i gefnogi dysgwyr i gynllunio, dylunio a datblygu gwefannau trafodiadol gweithredol;
• Darparu hyfforddiant athrawon ar gasglu, storio a phrosesu data, gan gynnwys dylunio system rheoli cronfa ddata berthynol a gweithredu SQL;
• Arwain athrawon ar werthuso cyflwyniadau asesiadau di-arholiad, gan gynnwys paratoi’r asesiadau, adborth a gwerthusiadau;
• Darparu’r holl adnoddau a deunyddiau dysgu sydd ar gael yn ddwyieithog er mwyn i athrawon gyfeirio atynt yn barhaus.

Deall Effeithiolrwydd Defnyddio Ffotograffau Trochol 360° ar Ddysgu ac Ymgysylltiad Disgyblion Ysgol Gynradd

Gemma Zeeman

Bu’r prosiect ymchwil hwn yn archwilio’r defnydd o Thinglink, platfform technoleg drochi i wella dysgu ac ymgysylltu mewn dosbarth Blwyddyn 3/4 yn Ysgol Gynradd yr Holl Saint, Wrecsam. Cymerodd disgyblion ran mewn her ystafell ddianc ryngweithiol yn cyd-fynd â’u pwnc cyfredol, Darganfyddiadau Rhyfeddol, ac wedi hynny creu eu hamgylcheddau dysgu rhithwir eu hunain gan ddefnyddio elfennau amlgyfrwng fel fideo, sain a delweddau.

Mae’r canfyddiadau’n awgrymu bod gan dechnolegau trochi fel Thinglink botensial cryf i gyfoethogi addysg gynradd trwy brofiadau dysgu gwahaniaethol, a arweinir gan ddisgyblion a thrawsgwricwlaidd.

Gallwch ddarllen mwy am y prosiect gan ddefnyddio’r botwm isod.

Archwilio rhyngweithio cydamserol, o bell rhwng dysgwyr gan ddefnyddio byrddau aml-gyffwrdd a fideo-gynadledda mewn ysgolion cynradd yn y DU

Gary Beauchamp,  Andrew Joyce-Gibbons,  James Mc Naughton,  Nick Young a Tom Crick

Mae’r astudiaeth hon yn archwilio cydweithredu o bell, trwy fwrdd aml-gyffwrdd (SynergyNet) a meddalwedd fideo-gynadledda (Skype). Bu pedwar ar hugain o gyfranogwyr (10-11 oed) mewn dau leoliad – ystafelloedd dosbarth ysgolion cynradd 300 milltir oddi wrth ei gilydd yn y DU – yn cymryd rhan mewn gweithgarwch cydweithredol ar yr un pryd i ddatrys tasg ddirgelwch Hanes.

Gallwch weld y papur mynediad agored ar gyfer y prosiect hwn gan ddefnyddio’r botymau isod.

Llywio Perthyn, Bregusrwydd, a Hunaniaeth mewn Ieuenctid Cymru Trwy Dechnoleg Trochol

Monty Kennard a Catrin Street-Mattox

Wedi’i ariannu gan Adnodd (Corff Comisiynu Llywodraeth Cymru), mae’r prosiect hwn yn archwilio sut y gall technolegau trochi hwyluso trafodaeth a dysgu am lesiant, cynhwysiant, perthyn, bregusrwydd a hunaniaeth i bobl ifanc yng Nghymru. Trwy greu adnodd 360 rhyngweithiol ‘dewiswch eich antur eich hun’, mae’r prosiect yn caniatáu archwilio’r pynciau hyn yn ddiogel ac yn gweithredu fel porth ar gyfer cychwyn trafodaethau ymhlith addysgwyr.

Wrth symud ymlaen, y weledigaeth yw cyd-greu’r senarios hyn mewn partneriaeth â phobl ifanc â phrofiad bywyd. Bydd y cydweithio hwn hefyd yn arwain at ymchwil pellach sy’n ymchwilio i ganfyddiadau myfyrwyr ac athrawon o ddefnyddio technoleg drochi i archwilio’r pynciau sensitif hyn.

Mae’r gyfres gyfredol o senarios, o’r enw ‘Chwarae Ymlaen | Play it Forward’, yn y cam prototeip ac arddangos. Cynhaliwyd ymchwil cefndirol cychwynnol trwy adolygiad cwmpasu, wedi’i ddilyn gan gynllunio a datblygu cysyniadau senarios a phrosesau creu.